ᐊᐅᒡᒍᓯᐅᑎᓪᓗᒍ 2006-ᒥ, ᑲᑎᒪᔭᖅᑐᖁᔭᐅᓂᕐᒧᑦ ᖃᐃᖁᔨᑎᓪᓗᒍ ᐱᓕᕆᕕᖓ ᐃᓕᓐᓂᐊᖅᑐᓕᕆᔨᒃᑯᑦ, ᐃᓕᓐᓂᐊᖅᑐᓕᕆᔨᒃᑯᓐᓄᑦ ᑲᑎᒪᔩᑦ ᓄᓇᕘᓕᒫᒥ ᑲᑎᑦᑐᕕᓃᑦ ᖃᑎᒪᐅᑎᒋᒍᒪᒃᓱᒍ ᑐᒃᓯᕋᐅᑕᐅᓂᖓᑕ ᓄᑖᑉ ᐃᓕᓐᓂᐊᖅᑐᓕᕆᓂᕐᒧᑦ ᒪᓕᒐᖅ.
ᑲᑎᒪᓂᕐᒥ ᐊᖏᔪᖅᑳᕆᔭᐅᔪᑦ ᐅᖃᖃᑎᒌᒍᑎᖃᖅᑐᒥᓃᑦ ᓱᓇᓂᒃ ᐊᑐᓕᖅᑐᓂᒃ ᑕᑯᒍᒪᔭᒥᓐᓂᒃ ᐃᓕᓐᓂᐊᖅᑐᓕᕆᓂᐅᑉ ᐊᐅᓚᓂᖓᓂ (ᑕᑯᓗᒍ ᓴᓂᕌᓃᑦᑐᑦ ᑎᑎᕋᖅᓯᒪᔪᖅ). ᑎᑭᐅᑎᒍᒪᓗᒋᑦ ᑕᒪᒃᑯᐊ ᐊᑐᓕᖅᑎᓪᓗᒋᑦ, ᐊᖏᔪᖅᑳᕆᔭᐅᔪᑦ ᐃᓱᒪᓚᐅᖅᑐᑦ ᑲᑐᔾᔨᖃᑎᒌᓄᑦ ᑭᒡᒐᖅᑐᖅᑕᐅᒋᐊᖃᕆᐊᒃᓴᖅ ᐱᔾᔪᑕᐅᓪᓗᐊᑕᖅᑐᑦ ᐊᑦᑐᐊᓂᓖᑦ ᐃᓕᓐᓂᐊᕕᓐᓂᒃ ᐅᖃᖃᑎᒌᒍᑕᐅᑎᓪᓗᒋᑦ, ᐃᓱᒫᓘᑕᐅᔪᑦ ᓲᕐᓗ ᒪᑯᐊ:
- ᓄᓇᓖᑦ ᐊᐅᓚᑦᓯᓂᖃᓗᑎᒃ ᐃᓕᓐᓂᐊᕕᓐᓂᒃ.
- ᐃᓕᓐᓂᖅᑐᓕᕆᓂᕐᒧᑦ ᐊᑐᐊᒐᖅ ᐃᑉᐱᒋᑦᓯᐊᕐᓗᒍ ᐅᖃᐅᓯᖅ ᐊᑐᖅᑕᐅᓂᐊᖅᑐᖅ ᐃᓕᓐᓂᐊᖅᑎᒃᓯᓂᐊᕐᓗᓂ, ᐃᓕᓴᐃᔨᐅᑉ ᐸᐃᑉᐹᖁᑎᖃᕐᓂᖓ, ᐃᓂᖅᑎᕆᔾᔪᓰᑦ ᐊᒻᒪᓗ ᐃᓕᓐᓂᐊᕈᑎᒃᓴᓕᐊᖑᓯᒪᔪᑦ.
- ᓇᒻᒪᒋᔭᐅᓂᖓ ᑮᓇᐅᔭᑦ ᐊᑐᖅᑐᒃᓴᐃᑦ ᐃᓕᓐᓂᐊᕐᕕᒻᒧᑦ.
- ᐃᖅᑲᓇᐃᔮᖓ ᐃᓕᓐᓂᐊᕕᒻᒥ ᐃᖅᑲᓇᐃᔭᖅᑎᐅᑉ.
ᑲᑎᒪᓂᕐᒥ, ᑭᒡᒐᖅᑐᐃᔩᑦ ᐊᑐᓂᒃ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᓐᓂᒃ ᓴᓂᕐᕙᒃᓱᑎᒃ ᑲᑎᒪᐅᑕᐅᔪᓂᒃ ᑲᑎᒍᒪᓪᓗᑎᒃ ᐃᒪᐃᓪᓗᑎᒃ “ᑎᒥᕈᖅᓯᒪᓐᖏᑦᑐᖅ ᑲᑐᔾᔨᖃᑎᒌᓪᓗᑎᒃ ᓂᐱᒋᔭᐅᓂᖓ ᐊᖏᔪᖅᑳᕆᔭᐅᔪᑦ’. ᓄᓐᖑᐊᓂ ᑖᑦᓱᒪ ᑲᑎᒪᓂᐅᑉ ᐱᒋᐊᕐᓂᕆᔭᐅᓂᖓ ᑭᒡᒐᖅᑐᐃᔨᖏᑦ ᐃᓕᓐᓂᐊᖅᑐᓕᕆᔨᒃᑯᑦ ᓄᓇᕘᒥ.
ᐱᓇᓱᐊᒐᖓ ᑭᒡᒐᖅᑐᐃᔩᑦ ᐱᒋᐊᖅᑎᑦᓯᒍᒪᓪᓗᑎᒃ ᓴᖅᑭᑎᑕᐅᕙᓪᓕᐊᓂᖓᓂᒃ ᐊᐅᓚᑦᓯᔩᑦ ᐱᔪᓐᓇᕐᓂᒐᓂᒃ, ᐃᒻᒥᓂᖅᓱᕐᓗᑎᒃ ᑎᒥᐅᓂᕐᒥᒃ, ᑭᒡᒐᖅᑐᕐᓗᒋᑦ ᑲᑐᔾᔨᖃᑎᒌᒍᑕᐅᓗᓂ ᓂᓪᓕᐊᓂᖓᑦ ᐊᖏᔪᖅᑳᕆᔭᐅᔪᑦ ᐃᓕᓐᓂᐊᖅᑐᓕᕆᓂᐅᑉ ᒥᒃᓵᓅᖓᔪᓄᑦ.
ᐸᕐᓇᑕᐅᓯᒪᓗᑎᒃ ᐱᓇᓱᐊᖅᑕᐅᒍᒪᔪᑦ
ᐅᖄᓚᐅᑎᒃᑯᑦ ᑲᑎᒪᒍᑕᐅᖃᑦᑕᖅᓯᒪᓕᖅᑐᑦ ᑕᐃᒪᖓᓂᒃ ᑭᒡᒐᖅᑐᐃᔩᑦ ᑎᒥᕈᓚᐅᖅᓯᒪᑎᓪᓗᒋᑦ, ᐊᒥᓱᑦ ᐸᕐᓇᑕᐅᓯᒪᓗᑎᒃ ᐱᓇᓱᐊᖅᑕᐅᒍᒪᔪᑦ ᓇᓗᓇᐃᖅᑕᐅᓯᒪᓕᖅᑐᑦ. ᑕᒪᓐᓇ ᐸᕐᓇᐃᓂᖅ ᐃᓄᒃᑎᑐᑦ ᑐᑭᖃᖅᑐᖅ ᓯᕗᓂᒃᓴᓕᕆᔩᑦ (ᐊᖅᑯᓯᐅᖅᑐᑦ).
- ᐅᖃᐅᔾᔨᒋᐊᕐᓂᖅ: ᐱᒋᐊᖅᑎᓪᓗᒍ ᑭᒡᒐᖅᑐᐃᔩᑦ ᐱᖓᔪᒋᔭᐅᓗᓂ ᓂᐱᒋᔭᐅᓗᓂ ᐃᓕᓐᓂᐊᕐᓂᓕᕆᓂᕐᒥ ᐱᔨᑦᓯᕐᓗᑎᒃ ᑎᒥᐅᓗᑎᒃ ᐅᖃᐅᔾᔨᒋᐊᖅᑎᐅᓂᕐᒧᑦ ᐃᓱᒫᓘᑕᐅᔪᓄᑦ ᐃᓕᓐᓂᐊᖅᑐᓕᕆᓂᕐᒧᑦ ᐊᑐᐊᒐᕐᒧᑦ.
- ᐃᑲᔪᖅᑐᐃᓂᖅ: ᐱᒋᐊᖅᑎᒃᓯᓗᑎᒃ ᐱᔪᓐᓇᓂᕐᒥᒃ ᑭᒡᒐᖅᑐᐃᔨᓄᑦ ᕿᒥᕐᕈᒍᓐᓇᓂᕐᒥᒃ ᐃᓕᓐᓂᐊᖅᑐᓕᕆᓂᕐᒧᑦ ᒪᓕᒐᕐᓂᒃ, ᐊᑐᐊᒐᕐᓂᒃ ᐊᑐᖅᑕᐅᕙᑦᑐᓂᓪᓗ ᓂᓪᓕᐊᒍᑎᒋᒍᓐᓇᕐᓗᒍᓗ ᐃᓱᒪᒋᔭᐅᔪᓂᓪᓗ ᐊᖏᔪᖅᑳᕆᔭᐅᔪᑦ ᑕᐅᑐᑦᑕᖓᒍᑦ.
- ᐊᐅᓚᑦᓯᔨᐅᑉ ᐱᔪᓐᓇᕐᓂᖓ: ᓴᖅᑭᑎᒃᓯᓗᑎᒃ ᐊᐅᓚᑦᓯᔨᐅᑉ ᐱᔪᓐᓇᕐᓂᖓᓂᒃ ᐱᔨᑦᓯᖅᑕᐃᓇᕆᓂᐊᕐᓗᒋᑦ ᐃᓕᓐᓂᐊᖅᑐᓕᕆᔨᒃᑯᓐᓄᑦ ᑲᑎᒪᔨᓕᒫᑦ ᐊᖏᔪᖅᑳᕆᔭᐅᔪᓪᓗ ᓴᖅᑭᑎᒃᓯᓗᑎᒃ ᐊᓪᓚᕕᒻᒥ, ᓱᑲᑦᑐᑰᕈᑎᖃᕐᓗᓂ/ᑲᕆᑕᐅᔭᒃᑯᑦ ᑐᕌᕈᑎᒥᒃ ᖃᕆᑕᐅᔭᒃᑯᓪᓗ ᖃᐅᔨᒋᐊᕐᕕᐅᒍᓐᓇᖅᑐᒥᒃ ᐱᔭᕆᐊᖃᓪᓚᕆᑦᑐᑎᒍᓪᓗ ᐊᐅᓚᑦᓯᔨᓄᑦ ᐃᑲᔪᖅᑐᖅᑕᐅᓂᕐᒥᒃ.
- ᐊᐅᓚᑦᓯᖃᑎᒌᓐᓂᖅ: ᐊᔭᐅᖅᑑᑎᒋᓗᒍ ᐊᐅᓚᑦᓯᓂᖅ ᐊᑯᓚᐃᑦᑐᒥᓪᓗ ᖃᐅᔨᒋᐊᖃᑦᑕᐅᑎᓂᖅ ᑖᑯᓇᓂ ᐃᓕᓐᓂᐊᖅᑐᓕᕆᓂᕐᒧᑦ ᑲᑎᒪᔨᓂ ᐊᖏᓪᓕᕙᓪᓕᐊᖁᓪᓕᒍ ᐊᑐᕐᓇᕐᓂᖓ ᑎᒥᐅᓗᓂ ᓂᐱᒋᔭᐅᓗᑎᒃ ᐃᓕᓐᓂᐊᕐᓂᓕᕆᓂᕐᒧᑦ ᑐᕌᖓᔪᓄᑦ.
- ᐱᔪᓐᓇᓂᕐᒥᒃ ᐱᕈᖅᓴᐃᓂᖅ: ᓇᓗᓇᐃᕐᓗᒋᑦ ᐱᕕᒃᓴᖃᕐᕕᐅᒍᓐᓇᖅᑐᑦ ᓴᓐᖏᑦᓯᒋᐊᕐᓗᒍ ᐱᔪᓐᓇᕐᓂᖓ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑕ ᓇᓗᓇᐃᕈᓐᓇᕐᓗᒋᑦ ᓂᓪᓕᐊᒍᑎᒋᓗᒋᓪᓗ ᐃᓱᒫᓘᑕᐅᔪᑦ ᐃᓕᓐᓂᐊᕐᓂᓕᕆᓂᕐᒧᑦ. ᐱᕚᓪᓕᑎᓪᓗᒍ ᐊᑑᑎᖃᕐᓂᖓ ᐃᓕᓐᓂᐊᖅᑐᓕᕆᔨᒃᑯᑦ ᓂᓪᓕᐊᔾᔪᑎᖏᑦ ᐃᓕᓐᓂᐊᕐᓂᓕᕆᓂᕐᒥ.
- ᐱᓕᕆᖃᑎᒌᓐᓂᖅ: ᐱᒋᐊᖅᑎᑦᓯᓗᑎᒃ ᓄᓇᓖᑦ ᑲᓇᑕᓕᒫᒥᓗ ᐱᓕᕆᖃᑎᒌᓐᓂᕐᒥᒃ ᐊᖏᔪᖅᑳᕆᔭᐅᔪᓂᒃ ᐃᓕᓐᓂᐊᕐᓂᓕᕆᓂᕐᒥ.
- ᖃᐅᔨᒪᓂᕐᒥᒃ ᐊᐅᓚᑦᓯᓂᖅ: ᓴᖅᑭᑎᒃᓯᓗᓂ ᖃᐅᔨᒋᐊᕐᕕᑦᓴᐅᓗᓂ ᐅᖃᓕᒫᒐᖃᕐᕕᒻᒥᒃ ᐊᖏᔪᖅᑳᕆᔭᐅᔪᓄᑦ ᐃᓗᓕᖃᕐᓗᑎᒃ ᑐᓴᕋᒃᓴᓂᒃ ᐃᓕᓐᓂᐊᕐᓂᓕᕆᓂᕐᒧᑦ ᑐᕌᖓᔪᓂᒃ ᐃᓱᒫᓘᑎᒋᔭᖏᓐᓄᑦ.